‘ಜೀವಜಲ’ವಿಲ್ಲದೆ ಜೀವನವಿಲ್ಲ
ಜಲೆವೆಂದರೆ ಬರಿ ನೀರಲ್ಲ ಅದು ಪಾವನ ತೀರ್ಥ ಎಂಬ ಸಂದೇಶ ಸಾರಿದ ರಾಷ್ಟ್ರಕವಿ ಕುವೆಂಪುರವರ ಮಾತು ಅಕ್ಷರಶಃ ಸತ್ಯ. ಆದರೆ ಈ ಪಾವನ ತೀರ್ಥದ ಮಹತ್ವ ಅರಿಯದೇ ಅದನ್ನು ಪೋಲು ಮಾಡುತ್ತಿರುವುದು ಮಾತ್ರ ವಿಷಾದನೀಯ. ನೀರಿನ ಪೋಲು ಹೀಗೆ ಮುಂದುವರೆದರೆ ಮುಂದೊಂದು ದಿನ ನೀರು ಪ್ರೆಟ್ರೋಲ್‌ಗಿಂತ ದುಬಾರಿಯಾದರೂ ಅಚ್ಚರಿ ಇಲ್ಲ.
ವಿಶ್ವ ಜಲ ದಿನಾಚರಣೆಯ ಈ ಹೊತ್ತಿನಲ್ಲಿ ನೀರಿನ ಬಗ್ಗೆ ಒಂದು ದಿನ ಮಾತನಾಡಿ, ಮರು ದಿನ ಅದನ್ನು ಮರೆತರೆ ಅದಕ್ಕೆ ಅರ್ಥವಿಲ್ಲ. ಪ್ರತಿದಿನವೂ ಜಲದಿನವಾಗಿ, ಜೀವಜಲದ ಮಹತ್ವ ಅರಿತು ಅದನ್ನು ಹಿತ-ಮಿತವಾಗಿ ಬಳಸುವುದು ಒಳ್ಳೆಯದು. ಹೀಗಾಗಿ ನಿಮ್ಮ ನಿತ್ಯ ಜೀವನಶೈಲಿಯ ಕೆಲವೊಂದು ಬದಲಾವಣೆಗಳಿಂದ ಸಾವಿರಾರು ಲೀಟರ್ ನೀರನ್ನು ಉಳಿಸಬಹುದು, ಆ ಕುರಿತಾದ ಕೆಲವು ಮಾಹಿತಿ ಇಲ್ಲಿದೆ.
ಊಹಿಸಿ…. ಎಚ್ಚೆತ್ತುಕೊಳ್ಳಿ
- ಈಗ ವಾರಕ್ಕೆ ಎರಡು ಅಥವಾ ಮೂರು ಬಾರಿ ಪೂರೈಕೆಯಾಗುತ್ತಿರುವ ನೀರು ವಾರಕ್ಕೊಮ್ಮೆಯಾದರೆ?
- ನೀವು ಮನೆಯಲ್ಲಿ ಬಳಸುವ ಪ್ರತಿ ಲೀಟರ್ ನೀರಿನ ಬೆಲೆ ಗಗನಕ್ಕೇರಿದರೆ? ನಗರಸಭೆಗಳು ನೀರಿನ ಬಳಕೆ ಮತ್ತು ಸರಬರಾಜಿನ ಮೇಲೆ ಮಿತಿ ಹೇರಿದರೆ?
- ನಿಮ್ಮ ವಾಹನ ತೊಳೆಯುವುದನ್ನು ನಿಷೇಧಿಸಿದರೆ (ಇದು ಈಗಾಗಲೇ ಹಲವು ರಾಜ್ಯಗಳ ಬರ ಪರಿಸ್ಥಿತಿಯಲ್ಲಿ ಜಾರಿಯಾಗಿವೆ)?
- ಕುಡಿಯಲು ಶುದ್ಧ ನೀರು ಸಿಗದೇ ಹೋದರೆ?
- ಈಗಾಗಲೇ ಕುಡಿಯುವ ನೀರು ಪ್ರತಿ ಲೀಟರ್ ೨೦ ರೂ ಆಗಿದೆ ಅದು ೧೦೦ಕ್ಕೆ ಏರಿದರೆ?
ಇವೆಲ್ಲ ಆದರೆ ಎಂಬ ಪ್ರಶ್ನೆ ಮಾತ್ರವಲ್ಲ… ಊಹೆಗೆ ನಿಲುಕದ್ದೂ ಅಲ್ಲ.. ಎಚ್ಚೆತ್ತುಕೊಳ್ಳದಿದ್ದಲ್ಲಿ ಈ ದಿನ ದೂರವಿಲ್ಲ
